Students Guide
دليل الطالب

سنة أولى سنة لذيذة والمواد بتاعتها خفيفة.. ركز مع الدكاترة كويس عشان ده هيخليك تعرف نظامهم ونظام أسئلتهم وامتحاناتهم ماشي ازاي
متشيلش هم اللغة والمصطلحات لأن واحدة واحدة هتتعود على ال English ومصطلحات المناهج وحفظ الأسامي هيبقى سهل ولو ده مسببلك مشكلة فهيتحل مع الوقت
101 عموما فيها ٤ مواد أساسية للكلية و٣ مواد بتبقى من ال University requirements ودي ملهاش علاقة مباشرة بالكلية
ال ٤ مواد هي:
🔸Biology 101
🔸Dentition 101
🔸Physics 101
🔸General chemistry


🔷Biology 101
▪️مادة ساعتين من ١٠٠ درجة
▪️محاضرة واحدة وسكشن واحد
🔸النظري بسيط و مش طويل خالص بيتكلم عن الخلايا وأنواعها وأشكالها و مكوناتها ووظيفة كل جزء فيها ومراحل انقسامها
🔸العملي بردو خفيف
بيتكلم عن تحضير شريحة الميكروسكوب وأنواعها وأنواع الميكروسكوبات
وبعدين بيتكلم عن الخلايا والأنسجة وأشكالها

🔷Dentition 101
▪️الماده ساعتين من ١٠٠ درجة
▪️محاضرة واحدة وسكشن واحد
🔸بندرس فيها مقدمة عن الأسنان وعددهم وأساميهم، بعدين فالشباتر قدام بنبدأ ناخد الmorphology بتاعت كل سنة واللي هو الشكل الخارجي بتاعها
🔸السكشن بيكون عبارة عن جزئين
أول جزء بيكون هو الcarving، وده بيكون عبارة عن اننا بننحت السنة اللي درسناها في النظري على شمع، بالنسبة للأدوات بتروح لل dental stores وتقول ليه انك عاوز أدوات سنة أولى (شمع+carver+knife+مسطرة صغيرة+ شراب حريمي+الشنطة اللي بتحط فيها الأدوات دي) ويفضل تشتري أي ازازة برفان من بره عشان بنحتاج أي حاجة فيها كحول، يعني هات أقل حاجة تلاقيها، ولازم كمان تشتري بالطو، وهيطلبوا منكم صورة شخصية للسكشن ده عشان ورقة الحضور،
تاني جزء في العملي هو انك بيجيلك صورة سنة وفيه سهم على جزء معين في السنة وانت عليك تكتب الlabel على الجزء اللي بيؤشر عليه السهم
بالنسبة لمعاد التسليمات فهو بيكون أسبوع ولو اتأخرت مش بتتاخد منك وبتخسر درجتها، فمتزنقش نفسك عشان الطبيعي إن الcarving في الأول يبقى رخم شوية فبتحتاج تجرب كذا مرة وتاخد فيه وقتك
وفي الآخر ضروري جدًا نهتم بالمادة دي لأن دي الوحيدة اللي متعلقة بالأسنان بشكل مباشر في الترم بتاعك، هي معلومات ممكن تبقا جديدة شوية بس هي سهلة ومسلية

🔷Physics 101
▪️الماده ٣ ساعات من ١٥٠ درجة
▪️محاضرة واحدة وسكشن واحد
🔸الجزء النظري بتاخد فيه مقدمة عن الفيزياء البحتة ومواضيع زي خصائص المواد والقوى وغيرها
🔸الجزء العملي بيشرحه المعيدين وهو عبارة عن مجموعة تجارب كل تجربة بتاخدها في أسبوع وبتطبقها
ومهم جدا نركز المعيد بيعمل التجربة ازاي عشان هتعملها لوحدك ف الفاينال
ودرجات العملي متقسمين على التجارب اللي بتعملها كل أسبوع وعلى الحضور وعلى الفاينال

🔷General chemistry
▪️المادة ساعات ب ٢٠٠ درجة مقسومين كالآتي:
٣ ساعات يعني 150 درجة ( general chemistry)
وساعة 50 درجة (analysis)
🔸بتاخدوا محاضرة ساعتين general ومحاضرة ساعة analysis في مواعيد مختلفة مش في نفس المحاضرة
الجينيرال كيميستري أهم جزء في المادة وسهل انك تقفله..
الأناليسيز مادة مش سهلة في مذاكرتها عشان كمية كبيرة ومضغوطة وممكن متفهمهاش دا طبيعي جدا.. وعشان كدا بقولك اهتم بالجينيرال هتعوض معاك..
🔸العملي على الجينيرال بس.. مهم تحضر السكاشن عشان تشتغل كل التجارب وتشوف بتتعمل ازاي وتسجل نظري العملي اللي هيتقالكم عليه..

سنة تانية عموما تقلها بس ف الحفظ لأن المادة النظرية فيها أكبر من العملية وصعوبتها أو سهولتها بتعتمد على قدراتك الشخصية وطريقتك ف المذاكرة

وده بوست لمواد 201 بنعرفكم فيه عليها باختصار

هتكون عندكم ٦ مواد أساسية:

🔸Dental materials 201

🔸Physiology 201

🔸General Anatomy (Anatomy 201)

🔸Biochemistry 201

🔸Microbiology 201

🔸Oral biology 201 (Oral histology 201)


🔷Dental materials 201

▪️المادة ساعتين يعنى من ١٠٠ درجة 

▪️محاضرة واحدة ف الأسبوع وملهاش عملي 

الماده على قد ما صغيرة بس مهمة علشان متقدرش تدخل 301 من غيرها

الماده ٧ شباتر بتتكلم عن المواد اللي بنستخدمها وأنواعها والخصائص بتاعتها 

تحسها خليط بين الفيزيا والكيميا مع بعض بس مهمة جدا لشغلنا  

بيكون ف العادة كل دكتور بيشرح شابتر 

كل سنة بيشرحوا شباتر معينة ويسيبوا غيرها ف مش شرط كل اللي ف الكتاب يتاخد

الحضور مهم جدا علشان الدكتور ممكن يجيب من اللي بيقوله ف المحاضرة 

السلايدز بتاعت المادة مهمة و بيكون موضحة الكلام اللي في الكتاب


🔷Physiology 201

▪️المادة ٤ ساعات من ٢٠٠ درجة 

▪️محاضرتين ف الأسبوع و ملهاش عملي 

المادة متقسمة جزئين: blood و cell 

كل جزء بيديها دكتور ومممن أكتر

الblood بيتكلم عن الدم و مكوناته والأمراض اللي ليها علاقه بيه 

فيه شابتر بيتكلم عن ال respiration و الجهاز التنفسي من غير تفاصيل كتير 

جزء ال cell بيتكلم عن ال nerve هندرس فيه الخلايا العصبية وازاى بتشتغل و حاجات خاصة بالجهاز العصبي و ال muscles وأنواعها وخصائصها و بتشتغل ازاي 

مادة السلايدز فيها مهمة بالذات ف ال cell 

حضورها مهم علشان مش سهل تفهمها لوحدك بس مش معناه انها صعبة بس خد بالك علشان طويلة شوية بس هي ممتعة ف مذكرتها


🔷Anatomy 201 

▪️المادة ٣ ساعات من 150 درجة

▪️محاضرة واحدة وسكشن واحد 

المادة ف نفسها مش تقيلة اوي بس متتسابش لليلة الامتحان عشان تفاصيلها كتير

هتدرسوا فيها زي رؤوس أقلام كده عن التشريح والترم اللي بعده ف 202 هتتخصصوا ف الجزء الخاص بشغلكم وهتاخدوا Head and Neck Anatomy 

محتاج فيها الحفظ والفهم سوا عشان تعرف منين يودي على فين وعشان الدنيا متدخلش ف بعضها

الدكاترة بيتغيروا فمنقدرش نعمم الكلام على أسلوب وطريقة الامتحان

العملي أسهل منه مفيش وامتحانه بسيط جدا بس محتاج يكون بيتراجع بشكل دوري


🔷Biochemistry 201

▪️المادة ٣ ساعات من ١٥٠ درجة 

▪️محاضرة واحدة و سكشن واحد 

المادة سهلة جدا كلها مركبات كيميائية ليها علاقة بالجسم زي ال protein وال lipid الخ .. بتتعرف على تركيبها وأنواعها وخصائصها حضورها مهم علشان الدكتور بيلغي منها حاجات وبيقول أسئلة بييجي منها الامتحان وبتتذاكر من الكتاب 

بالنسبه بقى للعملي مفيش أسهل من كده هما سكشنين واحد أول السنة وواحد بعد الميد وبيتعادو بناخد فيه تجارب بتلاقيها ف الامتحان ف العادي بتدخل الامتحان بالورق اللي فيه التجارب دى تنفذها وتكتب الخطوات و النتيجة


🔷Microbiology 201 

▪️المادة ٣ ساعات من ١٥٠ درجة 

▪️محاضرة واحدة وسكشن واحد 

المادة كبيرة شوية بتتكلم عن البكتيريا والفيروسات والمخلوقات الدقيقة وكل ما يتعلق بيها زي تكوينها وبتعيش فين والأمراض اللي بتعملها  ..

فيها شباتر كتيرة بس مش هتاخدوها كلها .. كل دكتور وبيختار الترتيب اللي شايفه مناسب والدكاترة بتتغير علشان كدا مش هنقدر نعمم اسلوب الشرح او طريقة الامتحان او الحضور   .. 

المادة محتاجة فيها مذاكرة اول باول عشان تبقى متابع اللي بيتضاف واللي بيتحذف مع الدكتور .. 

ضروري تاخدوا السلايدات من الدكتور لأنها هتشكل جزء كبير من مصدركم للمذاكرة

العملي بتاعها في الدفعة اللي الأكبر منكم كان سلايدات بتتعرف عليها سواء في بوربوينت أو في ميكروسكوب المعمل وكمان بتتعرف فيه على مكونات المعامل وأدواتها وتنظيفها وتعقيمها وكل ما يخصها


🔷 Oral histology 201

▪️المادة ٣ ساعات من ١٥٠ درجة

▪️المادة مكونة من 6 شباتر ( هتلاقيهم 7 شباتر ف الكتاب بس اخر شابتر غالبا بيتلغي) 

نتكلم بقا بشكل مختصر عن كل شابتر 

🔸Ch 1: Tooth development 

الشابتر ده بيتكلم عن ال stages

 بتاعت تكون السنة من أول ال crown لحد ال root 

وهيقولك ايه اللي بيحصل ف كل stage بالظبط 

🔸Ch 2: Enamel

الشابتر ده بيتكلم عن ال structure بتاع ال enamel و خصائصه الكيميائية والفيزيائية 

و التغيرات اللي بتحصل لل enamel مع العمر 

🔸Ch 3: Dentin

وده يعتبر أكبر شابتر ف المادة 

الشابتر ده زي الشابتر اللي قبليه هيكلمك عن خصائص ال dentin بردو بس زيادة عليه هيتكلم عن ال innervation بتاع ال dentin 


🔸Ch 4: Cementum

نفس العناوين اللي اتكلمنا عنها ف enamel هي هي نفس عنواين ال cementum 

🔸Ch 5: Pulp

 الشابتر ده بيتكلم عن ال structure وال cells بتاعت ال pulp والتغيرات اللي بتحصله مع العمر 


🔸 Ch 6: Preiodonal ligament (PDL)

وده آخر شابتر عندنا ف المنهج 

الشابتر ده بيتكلم عن ال structure و ترتيب ال fibers بتاعت ال PDL و ال cells اللي فيها

🔸السكاشن بيتاخد فيها الحضور وممكن تختلف طريقة شرح المعيدين فيها عن السنة اللي فاتت لاختلاف نظام الترم


🔷English 201 

🔸المادة ٣ ساعات ب ١٥٠ درجة

المادة الترم ده مختلفة شوية عن قبل كده لأنك هتاخد فيها medical termination وهتتعرف على الأسلوب الحواري وطريقة التعامل الصحيح بين الطبيب والمريض

ركز جدا على المصطلحات وال synonymes بتاعتها وتابع أي pdfs بينزلوها الدكاترة لأنها مهمة جدا وفيها جزء كبير جدا من مادة الامتحان


بس كده

اهتموا بالمتابعة مع الدكاترة وانتبهوا ف المحاضرات لأن ف أوقات كتيرة الدكاترة بتركز ع الملاحظات اللي بتقولها ف الشرح وبتجيبها ف الامتحانات ومش شرط تكون ف الكتاب أو ف السلايدز 

Follow our Facebook page
Loading...